Katër platformat kryesore të kompanisë Meta – Facebook, Instagram, WhatsApp dhe Messenger – pësuan ndërprerje të përkohshme gjatë ditës së premte, duke shkaktuar probleme për miliona përdorues në mbarë botën.
Sipas raportimeve të shumta në platformat e monitorimit të shërbimeve online, mijëra përdorues hasën vështirësi në kyçje, dërgimin e mesazheve, publikimin e postimeve dhe përdorimin normal të aplikacioneve. Problemet prekën si versionet mobile ashtu edhe ato në internet të shërbimeve të Metas.
Kompania Meta konfirmoi ndërprerjen përmes zyrtarëve të saj, duke bërë të ditur se ekipet teknike po punonin për rikthimin e plotë të sistemeve. Pas disa minutash, shërbimet nisën të rikthehen gradualisht dhe shumica e përdoruesve raportuan se platformat po funksiononin sërish normalisht.
Deri më tani, Meta nuk ka publikuar një shpjegim zyrtar për shkakun e saktë të ndërprerjes. Megjithatë, kompania ka bërë të ditur vetëm se bëhej fjalë për një problem teknik që ndikoi në funksionimin e disa prej shërbimeve të saj.
Ndërprerja shkaktoi reagime të shumta në rrjetet sociale, ku përdoruesit iu drejtuan platformave alternative për të raportuar problemet dhe për të kërkuar informacione rreth rikthimit të shërbimeve.
