Koreja e Veriut ka dërguar në Rusi zyrtarin më të lartë ushtarak Kim Yong Bok. Mediat ndërkombëtare flasin për një personazh misterioz, identiteti i të cilit pak njihej dhe mbahej përherë i fshehtë, por tashmë është një personazh publik. Ai është zyrtari më i lartë ushtarak i Koresë së Veriut në Rusi, ku më shumë se 11 mijë ushtarë të Koresë së Veriut janë vendosur për të ndihmuar përpjekjet e Moskës për të zhvendosur trupat ukrainase që kanë kapur një pjesë të territorit rus. Zyrtarët e Kievit dhe Seulit kanë konfirmuar praninë e tij në Rusi.
Zyrtarisht zëvendës shefi i shtabit të përgjithshëm të ushtrisë, kolonel gjeneral Kim besohet se ka për detyrë të integrojë trupat e Koresë së Veriut me rusët, të përvetësojë njohuritë e fushës së betejës për të rikthyer në shtëpi dhe krijimin e korridoreve për dislokimet e ardhshme.
Numri i ushtarëve të Koresë së Veriut të dërguar në Rusi përfundimisht mund të arrijë deri në 100 mijë, tha të martën presidenti ukrainas Volodymyr Zelensky. Ai nuk citoi prova specifike për pretendimin, citon “Wall Street Journal”. Por dërgimi i një prej zyrtarëve më të rëndësishëm ushtarakë të Koresë së Veriut sinjalizon interesin e Koresë së Veriut për të ndihmuar Rusinë deri në vitin e ardhshëm.
Deri kohët e fundit, identiteti i tij ishte relativisht i mbuluar, sepse njësia e forcave speciale që ai komandonte – që besohej se ishte më e madhja në botë, me rreth 200 mijë trupa – do të ndërmerrte misione sekrete në rast të një lufte në Gadishullin Korean, theksojnë ekspertët perëndimorë për “Wall Street Journal”.
