Merr tjetër rrjedhë ngjarja sa i takon vrasjes me thikë të 14-vjeçarit Martin Cani dhe plagosjes me thikë të shokut të tij, Luis Meçaj.
Deri më tani është bërë e ditur se ata janë sulmuar me thikë nga Marjo Perlleshaj, i cili është vënë dhe nën arrest. Por babai i Luisit, djali i cili është plagosur me thikë dhe ndodhet në spital, ka treguar një tjetër version të ngjarjes.
Ai ka treguar se sherri ka nisur që të premten dhe Martini i ka rrëfyer djalit të tij se e kishte goditur një person më i madh në moshë. Sipas tij, Martini kishte dhe një shenjë goditjeje në buzë.
“Luisi mban mend se çfarë i ka thënë Martini, sepse është në një shkollë tjetër. Ai shkoi atje se e kërkoi Martini. Ditën e premte janë takuar te shtëpia, se aty rrinë në lagje dhe i ka thënë, Luis unë kam pas një konflikt te shkolla sot, me dikë nga shokët e klasës paralele, kemi bërë llafe, jemi goditur, ka ardhur një i madh dhe më ka goditur. Martini kishte një shenjë të premten te buza, se i çova unë në stërvitje. Të goditur. Dhe i thotë mos i trego babait tënd dhe as unë timit, po hajde të hënën ta zgjidhim. Ditën e hënë në orën 13.20. Nuk e dimë ku e ka godit brenda apo jashtë shkollës”, ka rrëfyer Fiqiri Meçaj.
Më pas ai ka treguar se ditën e hënë kur dhe ndodhi sulmi me thikë, kanë qenë dy persona dhe jo një. Madje ai ka nxjerrë dhe emrin e personit tjetër që ka ndihmuar Marjon.
“Janë dy persona që kanë goditur me thikë fëmijët tanë, nuk është një. Luisi i ka parë që janë dy persona. Po ta them me emër që personi i parë që e ka goditur Luisin me thikë pas shpine është Kledjon Begaj, bashkëmoshatar dhe shok i autorit tjetër. Ky Kledjoni e ka pasur thikën më të vogël, rreth 10-12 cm dhe këto dëshmi i dhashë sot te Drejtoria e Policisë. Kledjoni e ka goditur i pari në shpatull djalin tim, plaga në shpatull është më shkurtër si plagë dhe më e ngushtë se ajo në bark, herën e dytë e ka goditur ky djali që është kapur Mario, dy herë dhe në fund pastaj e kanë goditur të dy se djali ka ikur i fundit pasi ka parë Martinin të rrëzuar në tokë. E ka ngrit dhe në atë moment ju hodhën të dy”, tha babai i Luisit në emisionin “Review” në “Euronews Albania”.
Pyetja që ngrihet është: Pse fshehu policia emrin e dytë? Sipas burimeve flitet se ai është djali i një efektivi policie, por do të shohim në vijim se çfarë qendrimi do të mbajnë uniformat blu. Babai i Luisit ka pretenduar se i biri është marrë fillimisht në pyetje nga një inspektor policie pa praninë e psikologut dhe i është bërë presion.
